पत्रकारहरूमा ‘शिष्टता नभएको’ भन्दै प्रधानमन्त्री केपी शर्मा ओलीले फेरि असन्तुष्टि व्यक्त गरेका छन् । मंगलबार नेपाल प्रज्ञा प्रतिष्ठानले आयोजना गरेको दोस्रो चीन र दक्षिण एसिया साहित्य सम्मेलन कार्यक्रममा आफ्नो मन्तव्यका क्रममा उनले पत्रकारहरूप्रति सो असन्तुष्टि पोखेका हुन् ।
आफ्नो भाषा र संस्कृतिलाई जोगाउन अरूको नक्कल नगर्न पनि उनले आग्रह गरेका छन् । अङ्ग्रेजी भाषाको ‘यु’ ले तँ, तिमी, तपाईं सबै अर्थ लगाउने भएकाले अन्य भाषाको अनुकरण गरी पत्रकारहरूले ‘तिमी’ भनेको उनले बताए । अङ्ग्रेजीको ‘यु’ लोभ लागेर बालाई तपाईं भन्ने हराउँदै गएको उनको तर्क थियो ।
‘अरूको नक्कल गर्ने बानीकै कारण पत्रकारले बाउलाई पनि तिमी भन्न थाले,’ केही सञ्चार माध्यमप्रति संकेत गर्दै प्रधानमन्त्रीले भने– ‘बाउलाई तपाईं भन्न पनि हिच्किचाउँछन् । सानालाई ‘तिमी’ र ठूलालाई ‘तपाईं’ भन्ने हाम्रो संस्कार हो । तर, यहाँ त पत्रकारले सबैलाई तिमी भन्न थाले’– उनले थपेको खबर यदुप्रसाद भट्टको बाइलाइनमा बुधबारको नेपाल समाचारपत्र दैनिकमा प्रकाशित छ ।
