नेत्रविक्रम चन्द ‘विप्लव’ नेतृत्वको ‘प्रतिबन्धित’ नेपाल कम्युनिस्ट पार्टी लडाकु दस्ता (सैन्य संरचना) निर्माणको तयारीमा रहेको खुलेको छ । हालै बरामद राजनीतिक दस्तावेजमा सैन्य संरचना बनाउने निर्णयहरू भेटिएको प्रहरीले जनाएको छ ।
पार्टीलाई बलियो बनाउन र प्रतिरक्षाका लागि सैन्य संरचना निर्माण गर्ने ती दस्तावेजमा उल्लेख छ । त्यसका लागि तालिम र प्रशिक्षण सञ्चालन गर्ने निर्णय भएको दस्तावेज प्रहरीले फेला पारेको छ । ‘बरामद दस्तावेज र निर्णय पुस्तिकामा सैन्य शक्ति निर्माण गर्ने उल्लेख गरेको भेटिएको छ,’ दाङका प्रहरी प्रवक्ता तथा डीएसपी विनोदविक्रम शाहले भने– ‘प्लाटुनसम्मका सैन्य संरचना बनाउने खाका रहेछ, राजापुरबाट पक्राउ परेका २१ जना विप्लवका नेताहरूबाट बरामद भएका दस्तावेजमा यो भेटिएको हो ।’
असोज ३० गते बिहान १ बजे राजपुर– ४, मगराइना गाउँबाट उनीहरू पक्राउ परेका थिए । सैन्य तालिम र प्रशिक्षणका लागि राजपुर क्षेत्र प्रयोग गर्ने योजना रहेको खुलेको छ । ‘खास गरेर प्रतिरक्षाका लागि यो संरचना तयार पार्दै रहेछन् भन्ने बुझिन्छ,’ डीएसपी शाहले भने– ‘दस्तावेजमा सेनाको कुरा पटक–पटक उल्लेख गरिएको छ, सैन्य संरचनासँगै मंसिरसम्म चन्दा संकलन बढाउने योजना पनि फेला परेको छ ।’ हालै पक्राउ परेका विप्लव नेकपाका नेता–कार्यकर्ताको अपडेटसम्बन्धी यो खबर गोपाल शर्माको बाइलाइनमा सोमबारको अन्नपूर्ण पोस्ट दैनिकमा प्रकाशित छ ।
