देशका १ सय ६० भन्दा बढी स्थानीय तहमा प्रशासकीय अधिकृत पद रिक्त रहेको छ । प्रशासकीय अधिकृत पद रिक्त हुँदा ती स्थानीय तह निमित्त प्रशासकीय अधिकृतको भरमा चलिरहेका छन् ।
संघीय मामिला तथा सामान्य प्रशासन मन्त्रालयका अनुसार दाङ उपमहानगरपालिका बाहेक बाँकी १० वटै उपमहानगरपालिका, १ सय १० नगरपालिका र ६० गाउँपालिकामा प्रशासकीय अधिकृत पद रिक्त रहेका छन् । प्रशासकीय अधिकृत नहुँदा कामकारबाहीमा समस्या उत्पन्न भइरहेको सर्वसाधारणको गुनासो छ ।
मन्त्रालयले भने कर्मचारी समायोजनलगायतका कारणले कर्मचारी अभाव भएको भन्दै छिट्टै नै पदपूर्तिको क्रम थालिने बताएको छ । लोकसेवा आयोगबाट स्थानीय तहमा कर्मचारी सिफारिस भएको र तिनीहरूलाई छिट्टै पदस्थापन गरिने तयारी गरिएको मन्त्रालयका कर्मचारी प्रशासन महाशाखा प्रमुख सहसचिव बाबुराम अधिकारीले जानकारी दिए ।
‘कर्मचारीकै अभावमा स्थानीय तहमा पदपूर्ति गर्न सकिएको छैन, अब भने छिट्टै पूर्ति गरिनेछ’– सहसचिव अधिकारीले भने । लोकसेवाबाट सिफारिस भई आएका अधिकृतलाई योग्यताक्रम (मेरिट) का आधारमा पदस्थापन गरिने उनले बताएको खबर केशवप्रसाद पाण्डेको बाइलाइनमा बिहीबारको राजधानी दैनिकमा प्रकाशित छ ।
