एक महिलालाई बलात्कार गर्न खोजेको आरोपमा पक्राउ परेका शम्भुनाथ नगरपालिका– १२, सप्तरीका वडाध्यक्ष लक्ष्मी साहलाई ‘ससम्मान रिहा गर्नुपर्ने’ मागसहित बुधबारदेखि अनिश्चितकालका लागि शम्भुनाथ नगरपालिका ठप्प पारिने भएको छ ।
नगरपालिका प्रमुख योगेन्द्र चौधरी, उपप्रमुख कविताकुमारी सरदार र सबै वडाध्यक्षको संयुक्त हस्ताक्षरबाट मंगलबार प्रेस विज्ञप्ति जारी गरी पक्राउ परेका वडाध्यक्ष साहलाई रिहा नगरिएसम्म नगरपालिका बन्द गरिने घोषणा गरिएको हो । शम्भुनाथ नगरपालिका वडा नम्बर १ देखि ११ सम्मका सबै वडाध्यक्षले विज्ञप्तिमा हस्ताक्षर गरेका छन् ।
वडाध्यक्ष साहमाथि ‘पूर्वाग्रही रूपमा प्रहरीले झुटा मुद्दा लगाएको’ निष्कर्षसहित निःशर्त रिहाइको माग गरिएको विज्ञप्तिमा उल्लेख छ । वडाध्यक्ष साहविरुद्ध प्रहरीमा उजुर गरेकी महिलाले गैरकानुनी कामका लागि वडाध्यक्षलाई दबाब दिएको तथा वडाध्यक्षले सो गैरकानुनी काम गर्न नमानेपछि उनीविरुद्ध प्रहरीमा मुद्दा दायर गरेको आरोप विज्ञप्तिमा लगाइएको छ ।
यद्यपि ती महिलाले वडाध्यक्ष साहलाई कस्तो प्रकारको गैरकानुनी काम गर्न दबाब दिएकी हुन् भन्ने चाहिँ विज्ञप्तिमा उल्लेख गरिएको छैन । पीडित भनिएकी महिलाले वडाध्यक्ष साहविरुद्ध उजुर गरे पनि साहविरुद्ध कुनै ठोस सबुत प्रमाण समेत नरहेको तथा प्रहरीले पूर्वाग्रही रूपमा जननिर्वाचित प्रतिनिधिमाथि झुटा मुद्दा लगाउने काम गरेको आरोप विज्ञप्तिमा लगाइएको छ ।
एक महिलालाई बलात्कार गर्न खोजेको आरोपमा वडाध्यक्ष साहसहित तीन जनालाई प्रहरीले मंसिर २५ मा पक्राउ गरेको थियो । कुखुरा फार्ममा बोलाएर ती महिलामाथि सामूहिक बलात्कार गर्न खोजेको आरोपमा वडाध्यक्ष साहसहित उनीहरूलाई पक्राउ गरिएको सप्तरी प्रहरीले जनाएको खबर बुधबारको नागरिक दैनिकमा प्रकाशित छ ।
