सर्वोच्च अदालतको निर्देशनात्मक आदेश मन्त्रालयहरूले पालना नगरेको भन्दै प्रधान न्यायाधीश चोलेन्द्रशमशेर जबराले सचिवहरूसँग प्रश्न गरेका छन् । सरकारका नाममा दिइने आदेश कल्याणकारी राज्य स्थापनाका लागि भएको भन्दै यसको कार्यान्वयनमा उनले जोड दिएका छन् ।
संविधान पालना गर्ने जिम्मेवारी सबैको भएको भन्दै सर्वोच्च अदालतको आदेश पालना गर्न प्रधान न्यायाधीश जबराले सचिवहरूलाई निर्देशन दिए । ‘नागरिकको सुरक्षा, पीडितको संरक्षण, भूगोलको रक्षा र ऐतिहासिक पुरातत्त्वहरूको संरक्षण गर्ने जिम्मेवारी सरकारको हो, सो हुन नसकेपछि अदालतले बाध्य भएर आदेश गरेको हो,’ सर्वोच्च अदालतमा आयोजित मन्त्रालयका सचिवहरुसँगको भेटमा उनले भने– ‘अदालतको आदेश पालना नगर्नु न्यायालय र संविधानलाई मान्दिनँ भन्नुसरह हो ।’
प्रधान न्यायाधीशको प्रश्नको जवाफमा मुख्य सचिव लोकदर्शन रेग्मीले अदालतको आदेश वा फैसला कार्यान्वयनको विकल्प नरहेको बताएको खबर नीराजन पौडेलको बाइलाइनमा सोमबारको राजधानी दैनिकमा प्रकाशित छ ।
