सत्ताधारी नेपाल कम्युनिस्ट पार्टी (नेकपा) का अध्यक्ष पुष्पकमल दाहाल ‘प्रचण्ड’ ले पार्टी अब दौडिने बताएका छन् । नेकपाको केन्द्रीय कमिटीको पूर्ण बैठक सकेको पर्सिपल्ट पोखरा आएका उनले पार्टीले गियर बदलेको भन्दै अब पिकअप लिएर दौडिने बताएका हुन् ।
नेकपाका कार्यकर्तासँगको भेटघाटका क्रममा उनले पार्टीलाई बैठकले एकढिक्का बनाएको समेत बताए । ‘हामीले जस्तो योजना बनाएका थियौं, बैठक त्यस्तै भयो,’ उनले भने– ‘केन्द्रीय कमिटीको बैठकले पार्टीमा अभूतपूर्व एकताको सन्देश दियो, बैठकको यो महत्त्वपूर्ण उपलब्धि हो ।’
बैठक अन्तिमसम्म आइपुग्दा को ‘पूर्व’ र को ‘पश्चिम’ भन्नेसम्म बिर्सिएको प्रचण्डले दोहोर्याए । मिलेनियम च्यालेन्ज कर्पोरेसन (एमसीसी) बारे थप स्पष्ट हुन बनाइएको कार्यदलमा पूर्वमाओवादी केन्द्रबाट एक जना पनि सदस्य नपरेपछि भएको खासखुसप्रति अध्यक्ष प्रचण्डले ‘ए हो त, मैले पनि यो कुरामा त ख्यालै गरेको रहेनछु’ भन्ने जवाफ दिएकोबारे मंगलबारको कार्यकर्ता भेटघाटमा चर्चा भएको थियो ।
सोही प्रसंग कोट्याउँदै प्रचण्डले भने– ‘बैठकको अन्तिमसम्म पुग्दा को पूर्व भन्ने नै बिर्सिइएछ, यो हुनैपर्ने थियो, भयो र राम्रो भयो । बैठकपछि पार्टी ठीक ट्र्याकमा आएको छ, पार्टीले बाटो पक्डियो, गियर समेत बदलिसकेको छ, अब दौडिन्छ ।’
प्रचण्डको पछिल्लो समयको आत्मसन्तुष्टिसम्बन्धी यो खबर सन्देश श्रेष्ठको बाइलाइनमा बुधबारको नागरिक दैनिकमा प्रकाशित छ ।
