नेपालमा हालसम्म भेटिएका कोरोना संक्रमितमध्ये अधिकांश विदेशबाटै आएका व्यक्तिहरु छन् । अझ धेरै त भारतीय नागरिक नै रहेका छन् । नेपाली संक्रमितमध्ये कोही स्थलमार्ग हुँदै भारतबाट आएका छन्, कोही विभिन्न अन्तर्राष्ट्रिय उडान हुँदै आएको पाइएको छ ।
अन्तर्राष्ट्रिय उडानबाट आएर संक्रमण पुष्टि भएका व्यक्तिहरुले स्वदेश आउँदा अहिलेसम्म चार वटा विमान प्रयोग गरेको देखिएको छ भने स्वदेश आएपछि गन्तव्यमा पुग्न दुई आन्तरिक विमान प्रयोग गरेको पाइएको छ ।
संक्रमितमध्ये केहीले स्वदेश आएपछि आन्तरिक उडानमार्फत यात्रा गरेको र उनीहरु सवार विमानको पहिचान गरेर प्रहरीले खोजी गरिरहेको छ । संक्रमितका ९१ जना विमान सहयात्री अझै सम्पर्कमा आउन नसकेको खबर महेश्वर गौतमको बाइलाइनमा शनिबारको राजधानी दैनिकमा प्रकाशित छ ।
