पहिरोले घर पुरिँदा शुक्रबार बिहान घाइते भएकी धवलागिरि गाउँपालिका– ६, राम्चेकी २२ वर्षीया मञ्जिता श्रीपालीको शनिबार बिहान ११ बजे मात्र उद्धार भयो । ६ महिनाकी गर्भवती मञ्जिताले करिव डेढ दिन उद्धार र उपचारको पर्खाइका लागि छटपटीमै बिताउनु पर्यो । बेनी अस्पतालमा प्राथमिक उपचारपछि उनलाई हेलिकप्टरमार्फत दिउँसै पोखराको मणिपाल शिक्षण अस्पताल पुर्याइयो ।
यसैगरी, शनिबार १ बजे हेलिकप्टरबाट बेनी अस्पताल ल्याइएकी ८८ वर्षीया गौमती सुनार पनि पहिरोमा भाग्दाभाग्दै हात, खुट्टा र शरीरका विभिन्न भागमा चोट लागेर घाइते भएकी थिइन् । ‘गाउँबाट बाहिर जाने बाटो पहिरोले बगाएकाले स्वास्थ्य चौकीसम्म पनि लैजान सकेनौं,’ गौमतीका नाति हरिले भने– ‘हेलिकप्टरको पर्खाइमा छट्पटाउँदै बस्नुभयो ।’
शुक्रबार बिहानै कोदो रोप्न बारीमा जाने रिखकी हीरा जुग्जालीको योजना पनि उज्यालो हुन नपाउँदै खसेको पहिरोले पूरा हुन दिएन । ‘बिहानै मेलामा जाने योजना थियो, जेठी छोरी र छोरा मसँगै थिए,’ हीराका श्रीमान् धनबहादुरले भने– ‘अर्को कोठामा सुतेका दुई छोरी र पत्नीलाई बचाउन खोज्दाखोज्दै पहिरोले बगायो ।’ बेनी अस्पतालमा उपचार गराइरहेका धनबहादुर पत्नी, छोरी कञ्चन र करिश्मालाई गुमाउनुको पीडाले भक्कानिए ।
जुग्जालीका छोरा अर्जुन र अर्की छोरी ऋतु पहिरो आएको थाहा पाएपछि भागेका थिए । शरीरमा लागेको चोटको पीडा करिव ३६ घन्टासम्म खपेर बसेका धनबहादुरले अस्पताल आएपछि दुखाइ कम भएको सुनाए । ‘अन्नबाली उब्जाउने खेतबारी, गोठ र घर सबै पहिरोले बगायो,’ उनले भने– ‘न बस्ने घर छ न जीवनमा साथ दिने पत्नी र साना छोरी रहे ।’
पहिरोमा घाइते भएका १२ जनाको शनिबार दिउँसो नेपाली सेना र प्रभु एयरको हेलिकप्टरमार्फत उद्धार गरिएको थियो । मञ्जितासहित मालिका– ७, बिमका ४० वर्षीय पूर्ण परियार, धवलागिरि– ६ का बालसिंह रोका, सफल श्रीपाली र ताकमकी ६७ वर्षीया सतदेवी बिटालुलाई पोखरा रिफर गरिएको बेनी अस्पतालले जनाएको खबर सन्तोष गौतमको बाइलाइनमा आइतबारको अन्नपूर्ण पोस्ट् दैनिकमा प्रकाशित छ ।
