प्रक्षेपण– १

अक्सफोर्ड विश्वविद्यालयका २ निकायले देशव्यापीरुपमा समुदायस्तरमा संक्रमण फैलिइरहे नेपालमा ८१ प्रतिशत जनसंख्यामा कोरोना लाग्ने प्रक्षेपण गरेका छन् । यो प्रक्षेपणअनुसार नै हुने हो भने समुदाय तहमा देशव्यापी कोरोना फैलिएर समयमा उपचार नपाएको अवस्थामा सन् २०२० को अन्त्यसम्ममा ४९ हजार २ सय जनाको मृत्यु हुनेछ ।

प्रक्षेपण– २

स्वास्थ्य तथा जनसंख्या मन्त्रालयले नै पनि सुरुमा नेपालमा १४ हजार ८ सय ९८ जना कोरोना संक्रमित हुने प्रक्षेपण गरेको थियो । खराब अवस्था आए साउन २५ सम्म ९१ हजार संक्रमित पुग्ने भनिएको थियो । जनस्वास्थ्य मापदण्ड अपनाए भदौ २ सम्म ३९ हजार पुग्ने प्रक्षेपण मन्त्रालयले गरेको थियो ।

प्रक्षेपण– ३

नेपालमा पहिलो कोरोना संक्रमित निको भएको केही सातापछि संस्कृति, पर्यटन तथा नागरिक उड्डन मन्त्रालयले प्रक्षेपण गर्दै भन्यो– ‘मुलुकलाई कोरोना संक्रमणमुक्त राष्ट्र घोषणा गर्नुपर्छ, विभिन्न भाषामा प्रचार सामग्री तयार गरी पर्यटक भित्र्याउनुपर्छ ।’

०००          ०००          ०००

नेपालमा कोरोना भाइरस संक्रमणको अवस्था र गतिबारे राष्ट्रिय तथा अन्तर्राष्ट्रिय प्रक्षेपण ‘हावादारी’ सावित भएका छन् । अक्सफोर्डको प्रक्षेपणअनुसार समुदायस्तरमा संक्रमण फैलिइरहेको अवस्थामा कोरोनाबाट झन्डै २ करोड ४० लाख जनसंख्या संक्रमित हुनेछन् । जुनदेखि सेप्टेम्बरसम्म (असार १७ देखि भदौ १५ सम्म) प्रतिदिन ५० हजारदेखि ७५ हजारसम्म संक्रमित हुने सो प्रक्षेपणमा उल्लेख छ । जुलाईदेखि अक्टोबर (साउन १७ देखि कात्तिक १५ सम्म) संक्रमण उच्च विन्दुमा पुग्ने जनाइएको छ ।

स्वास्थ्य मन्त्रालयका पदाधिकारी भने नेपालका सबै ठाउँमा समुदाय तहमा कोरोना संक्रमण फैलिइनसकेको दाबी गर्छन् । कोरोना संक्रमण कतिपय ठाउँमा क्लस्टरमा (समूहमा) र तराईका कतिपय स्थानमा समुदायउन्मूख रहेको मन्त्रालयले जनाएको छ ।

जनस्वास्थ्यविद् डा. रवीन्द्र पाण्डे अक्सफोर्डको प्रक्षेपण गलत रहेको दाबी गर्छन् । सामाजिक सञ्जालमा उनले लेखेका छन्– ‘महामारीका बेला यस्ता भ्रम फैलिइरहन्छन्, यस्ता हल्ला र भ्रमको विश्वास गर्नु आवश्यक छैन ।’

नेपालमा कोरोनाभाइरस संक्रमणको अवस्था र गतिबारे भएका ‘हावादारी’ प्रक्षेपणसम्बन्धी यो खबर दिनेश गौतमको बाइलाइनमा आइतबारको अन्नपूर्ण पोस्ट दैनिकमा प्रकाशित छ ।