अपदस्थ प्रधानमन्त्री एवं नेकपा (एमाले) का अध्यक्ष खड्ग ओली र नेपाल कम्युनस्टि पार्टीका महासचिव नेत्रविक्रम चन्द ‘विप्लव’ बीच भेटवार्ता भएको छ । ओलीनिवास बालकोटमा मंगलबार भएको भेटवार्तामा सहभागी एमाले नेता राजन भट्टराईका अनुसार भेटमा विप्लवले यसअघि भएको सहमतिअनुसार अगाडि बढ्ने जानकारी दिए ।
पछिल्ला केही दिनयता विप्लवले नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’, एमालेका वरिष्ठ नेता माधवकुमार नेपाल, नेकपा क्रान्तिकारी माओवादीका महासचिव मोहन वैद्य ‘किरण’ र जनता समाजवादी पार्टी (जसपा) सङ्घीय परिषदका अध्यक्ष डा. बाबुराम भट्टराईसँग भेट गरिसकेका छन् ।
विभिन्न दलका यी नेताहरूसँगको भेटमा विप्लवले तीनबुँदे सहमतिको कार्यान्वयन तथा अझै हिरासतमा रहेका आफ्ना नेता तथा कार्यकर्ताको रिहाइको बारेमा चासो व्यक्त गरेका थिए । ती भेटमा उनले वर्तमान संसदीय व्यस्थाको विकल्पमा वैज्ञानिक समाजवाद स्थापना गर्नुपर्ने भन्दै संसदीय व्यवस्था कि वैज्ञानिक समाजवाद भन्ने प्रश्नमा जनमतसंग्रह गर्न प्रस्ताव गरेको खबर बुधबारको गोरखापत्र दैनिकमा प्रकाशित छ ।
