पार्टी अध्यक्ष खड्ग ओली विश्वास गर्न लायक नहुँदा एकता प्रक्रिया पर धकेलिएको नेकपा (एमाले) का वरिष्ठ नेता माधवकुमार नेपालले बताएका छन् । आफू पक्षधर केन्द्रीय सदस्यहरूको बैठकमा बिहीबार नेपालले भने– ‘एकताको कुरा अगाडि बढ्ने बित्तिकै अध्यक्षले भोलिपल्टै अर्को कुरा गर्न थाल्नुहुन्छ, त्यसले गर्दा विश्वासको वातावरण बनेको छैन, सहमति पनि खण्डित भएको छ; केही विषयमा सहमति भएका छन् तर धेरै विषयमा सहमति भएको छैन ।’
सहमतिको प्रस्ताव आएकै बेला काठमाडौं जिल्ला कमिटीको बैठकमा ओलीले ‘माधव नेपाल राष्ट्रद्रोही हो’ भनेको प्रसंग उल्लेख गर्दै नेपालले थपे– ‘एक दिनअघि प्रस्ताव गर्ने, भोलिपल्ट अर्कै भाषण गर्ने कुराले परिस्थिति बिगारेको छ । अध्यक्षको प्रस्ताव आएको छ तर केही पनि टुंगो लागेको छैन । उनी नजिकका नेताहरू त्यो हुन्न भनिरहेका छन् ।’
सम्मानजनक हैसियतमा पार्टी एकता हुने वातावरण तयार नहुँदासम्म ओलीसँग झुक्नु नहुने नेपालले बताए । पार्टीभित्रको विवाद मिलाउने मुख्य जिम्मेवारी अध्यक्षको नै भएको उनले बताए ।
साउन २४ अघि नै सहमति कायम गर्न कार्यदलमा रहेका नेताहरूलाई नेपालले आग्रह गरेका छन् । अध्यक्ष ओलीले साउन २४ मा केन्द्रीय कमिटी बैठक बोलाएका छन् । ‘२४ गते केन्द्रीय कमिटी बैठक बोलाएको भन्ने सुनिएको छ, हामीले के गर्ने– त्यसअघि नै निष्कर्ष निकालेर अघि बढ्नुपर्छ’– नेता नेपालले भने ।
एकताको प्रयास दुवै पक्षबाट भएको उनले बताए । ‘हामी सबै एकताको प्रयासमा छौं, यो प्रयास हामी र ओलीकै मान्छेबाट पनि भइरहेको छ । एकताकै लागि ओलीका मान्छेहरू पनि आएर मसँग बारम्बार छलफल गर्छन् तर सहमतिमा भने पुगिएको छैन’– नेपालले भने ।
केन्द्रीय सदस्य ठाकुर गैरेले नेपालकै भनाइमा टेकेर चैतमा भएको कार्यकर्ता भेलाले लिएको निर्णयमा कुनै फेरबदल नआएकाले त्योभन्दा बाहिर जानु नहुने बताए । ‘गत चैतमा गरिएको कार्यकर्ता भेला र त्यसपछिको केन्द्रीय कमिटीको बैठकले लिएको निष्कर्षकै जगमा हामी छौं, त्यो आजसम्म फेरिएको छैन । हामी त्यही ठाउँमा भएका कारण पार्टीलाई विभाजन गर्ने कुरा कहीं छैन’– गैरेले भनेको खबर शुक्रबारको नागरिक दैनिकमा प्रकाशित छ ।
