एमालेभित्रको ‘विवाद मिलाउन’ राष्ट्रपति विद्यादेवी भण्डारीलाई ‘मध्यस्थत’ गर्न आग्रह गरिएको छ । एमाले उपाध्यक्ष भीम रावलले शनिबार राष्ट्रपति भण्डारीलाई भेटेर ‘विवाद मिलाउन’ मध्यस्थता गरिदिन आग्रह गरेका हुन् ।
उपाध्यक्ष रावलले राष्ट्रपतिसँग करिव तीन घन्टा ‘छलफल’ गरेका थिए । स्रोतका अनुसार ‘विवाद मिलाउन’ पार्टी अध्यक्ष खड्ग ओली नै बढी जिम्मेवार हुनुपर्नेमा कार्यदलबाट लगेको प्रस्ताव समेत अस्वीकार गर्ने परिस्थिति बनेको ‘गुनासो’ रावलले गरेका थिए । ‘पार्टी बचाउने जिम्मेवारी सबैको हो, त्यसका लागि तपाईं (राष्ट्रपति भण्डारी) ले मध्यस्थको भूमिका निर्वाह गर्नुस् । माधव नेपालको पनि प्रतिष्ठा कायम रहोस्, माधव नेपाल पार्टीबाहिर रहे कम्युनिस्ट आन्दोलनलाई घाटा हुन्छ’– रावलको भनाइ उद्धृत गर्दै उनीनिकट एक नेताले भने ।
ती नेताका अनुसार एमाले टुक्रिए ‘वाम’ आन्दोलन छिन्नभिन्न हुनेमा राष्ट्रपति भण्डारी र रावल सहमत भएका थिए । ‘कम्युनिस्ट आन्दोलनको मूल प्रवाहका रुपमा रहेको एमालेभित्र देखिएको विवादमा ओलीले हदैसम्म पेलेको सत्य हुँदाहुँदै माओवादी समेत एकीकरण भएपछि बनेको नेकपाले एमालेको विवादलाई थप उत्कर्षमा पुर्याएको विषयमा समेत चर्चा भएको थियो’– स्रोतले भन्यो ।
भेटमा राष्ट्रपति भण्डारीले पनि रावललाई पार्टी एकताकै पक्षमा निरन्तर प्रयास गर्न आग्रह गरेकी थिइन् । आफूले पनि भूमिका निर्वाह गर्ने ‘वचन’ उनले दिएकी थिइन् । राष्ट्रपति भण्डारीसँग भेटघाट गरेपछि रावल ओलीलाई भेट्न बालकोट पुगेका थिए । बालकोटमा उनले आइतबारको केन्द्रीय कमिटी बैठक रोक्न आग्रह गरेका थिए । ओली बैठक सार्न सहमत भए पनि अन्य विषयमा भने सहमत नभएको खबर सोमबारको नागरिक दैनिकमा प्रकाशित छ ।
