सरकार सञ्चालनलाई ‘प्रभावकारी बनाउन’ नेपाली कांग्रेसका वरिष्ठ नेता रामचन्द्र पौडेलको संयोजकत्वमा गठित ुउच्चस्तरीय राजनीतिक संयन्त्रु को बैठकले राष्ट्रियसभाको निर्वाचनलाई प्रभावकारी बनाउन भन्दै सातै प्रदेशमा समन्वय समिति निर्माण गर्ने निर्णय गरेको छ । प्रधानमन्त्री निवास बालुवाटारमा बिहीबार बसेको प्रधानमन्त्री शेरबहादुर देउवासहितका सत्ता साझेदार दलका शीर्ष नेताहरूको बैठकले यस्तो निर्णय गरेको हो ।
बैठकपछि वरिष्ठ नेता पौडेलले जनाएअनुसार केन्द्रको संयन्त्रले सबै प्रदेश समितिलाई निर्देशन जारी गर्ने र सत्तारूढ दलका प्रदेश नेतृत्व सम्मिलित समन्वय समिति गठन गर्ने निर्णय गरिएको हो । ‘सत्ता साझेदार दलका तर्फबाट साझा उम्मेदवार बनाइनुभएका साथीहरूलाई जिताउनका लागि केन्द्रबाट निर्देशन दिने र सातै प्रदेशमा पाँच दलका प्रतिनिधि रहेको समन्वय समिति गठन गरेर अघि बढ्ने निर्णय भएको छ’– पौडेलले भने ।
सत्तारूढ दलहरूको केन्द्रीय नेतृत्वले पनि आफ्ना उम्मेदवारहरूलाई जिताउन सर्कुलर जारी गर्ने निर्णय भएको एकीकृत समाजवादीका महासचिव डा. वेदुराम भुसालले बताए । वरिष्ठ नेता पौडेलका अनुसार राष्ट्रियसभा निर्वाचनसँगै स्थानीय तह, प्रदेश र प्रतिनिधिसभाको निर्वाचनबारे पनि बैठकमा छलफल भएको छ । माघ १२ मा राष्ट्रियसभाका १९ सिटका लागि निर्वाचन हुँदैछ ।
गोरखापत्र दैनिकबाट
