‘श्री अध्यक्षज्यू,
नेपाल पत्रकार महासंघ
केन्द्रीय कार्यालय, सञ्चारग्राम, तिलगंगा, काठमाडौं ।
विषय : ध्यानाकर्षण पत्र ।
अध्यक्षज्यू,
‘क्रान्तिकारी पत्रकार महासंघ’ श्रमजीवी पत्रकारहरुको नेतृत्वदायी संगठन हो । स्थापनाकालदेखि नै यस महासंघले श्रमजीवी पत्रकार ऐनको कार्यान्वयन, पे्रस तथा अभिव्यक्ति स्वतन्त्रताको ग्यारेन्टी, सम्पादकीय स्वतन्त्रता, लोककल्याणकारी विज्ञापनको समानुपातिक वितरण, साना लगानीका तथा जनपक्षीय मिडियाहरुको संरक्षण र सम्बर्द्धन, श्रमजीवी पत्रकारहरुको पेशागत तथा भौतिक सुरक्षाको ग्यारेन्टी, मिडियामा वैदेशिक र अपारदर्शी लगानीलाई निषेध, मिडियाका कन्टेन्टको समावेशीकरण, निष्पक्ष, मर्यादित, जिम्मेवार र जवाफदेहीपूर्ण पत्रकारितालगायतको पक्षमा खरो रुपमा वकालत गर्दै आएको छ ।
हाम्रो महासंघ ‘नेपाल पत्रकार महासंघ’ लाई छाता संगठन मान्दछ । हाम्रो संगठनले उठाएका उल्लेखित विषयलाई समेत नेपाल पत्रकार महासंघले पनि आफ्नो कार्यसूचीमा राखोस् र त्यसको प्रभावकारी कार्यान्वयनमा नेतृत्वदायी भूमिका निर्वाह गरोस्, हामी गम्भीर रुपले ध्यानाकर्षण गराउन चाहन्छौं । यसका अतिरिक्त निम्न विषयहरुमा हामीले विशेष ध्यानाकर्षण गराउनु आवश्यक ठानेका छौं–
१. हाम्रो संगठनलाई नेपाल पत्रकार महासंघको नेतृत्वले बेवास्ता गर्दै आएको छ र प्रायः निर्णय प्रक्रिया, विविध सरोकार राख्ने कार्यक्रममा हाम्रो संगठनलाई सहभागी गराएको छैन । हाम्रो संगठनप्रतिको निषेधकारी व्यवहार सच्याइयोस् र नेपाल पत्रकार महासंघलाई साँच्चैको छाता संगठनको भूमिकामा स्थापित गरियोस् ।
२. नेपाल पत्रकार महासंघका हरेक निर्णय प्रक्रियामा तीन ठूला राजनीतिक पार्टीहरु– नेपाली कांग्रेससम्बद्ध प्रेस युनियन, नेकपा (एमाले) सम्बद्ध प्रेस चौतारी र नेकपा (माओवादी केन्द्र) सम्बद्ध प्रेस सेन्टरको ‘सिन्डिकेट’ लादिएको छ । हाम्रो संगठन यसको कडा शब्दमा विरोध गर्दछ । नेपाल पत्रकार महासंघलाई तीन ठूला संगठनका कार्यकर्ताहरुको भर्तीकेन्द्र र पेवा नबनाइयोस् भनी जोडदार माग गर्दछ ।
३. नेपाल पत्रकार महासंघको आवधिक चुनाव नजिकिँदैछ । महासंघले शुद्धीकरण अभियान चलाओस् । गैरपत्रकार, निष्क्रिय पत्रकार, उद्योगी, व्यापारी, कर्मचारी, राजनीतिक पार्टीका नेता–कार्यकर्ताहरु (जो प्रत्यक्ष रुपले पत्रकारिता पेशामा संलग्न छैनन्) लगायतको सदस्यता खारेज गरियोस् । र, नेपाल पत्रकार महासंघलाई सक्कली (क्रियाशील) पत्रकारहरुको साझा संगठन बनाइयोस् ।
४. देशैभरबाट धेरै क्रियाशील र योग्यता पुगेका पत्रकारहरु नेपाल पत्रकार महासंघको सदस्यता लिनबाट वञ्चित भएका छन् । आफ्नो अनुकूलतामा नयाँ सदस्यताका लागि आवेदन खुला गर्ने र बन्द गर्ने नगरियोस् । आस्थाको आधारमा भेद्भाव र बाधा–अड्चन खडा नगरियोस् ।
५. महासंघको आसन्न चुनावमा गरिने अमर्यादित गतिविधि र अपारदर्शी चलखेललाई निषेध गरियोस् । पेशागत हिसाबले अमर्यादित ठानिने ‘जाँड–रक्सी’ को प्रयोगलाई प्रतिबन्ध लगाइयोस् ।
अन्तमा, हाम्रो संगठनले उठाएका उल्लेखित विषयहरु सम्बोधन नगरिने, हामीप्रतिको अपमानपूर्ण र निषेधकारी व्यवहारलाई नसच्याइने हो र सहकार्यको ढोका बन्द गरिने हो भने क्रान्तिकारी पत्रकार महासंघ वैकल्पिक महासंघको रुपमा अगाडि बढ्न बाध्य हुने कुरा पनि यसै ध्यानाकर्षण पत्रमार्फत् अवगत गराउन चाहन्छौं ।’
–इन्द्र राउत, अध्यक्ष
